Erməni kilsəsi ilə hakimiyyətin "vergi qalmaqalı" böyüdü - Simonyan kilsəyə bazar dedi...
![Image](/uploads/posts/2024-05/pashinyan-simonyan.webp)
Tural İrfan: “Özbaşına fəaliyyət göstərib, vergi verməyib, talançılığa yol verib, cəmiyyəti din adı ilə istismar edib”
Erməni Qriqoryan kilsəsi ilə Ermənistan hakimiyyəti arasında uçurum get-gedə dərinləşir. Son zamanlar kilsənin hakimiyyətə müxalif kimi özünü açıq şəkildə göstərməsi yeni qalmaqllara səbəb olub.
Hazırda Ermənistanda ən aktual məsələlərdən biri erməni kilsəsinin vergiyə cəlb edilməsidir ki, hökumət rəsmiləri bunda israrlıdır. Ermənistan parlamentinin spikeri Alen Simonyan bildirib ki, kilsənin vergiyə cəlb edilməsi vacibdir və bu istiqamətdə müzakirələr aparılacaq, kilsənin vergilərdən yayınmasına imkan verilməyəcək: “Yaxın vaxtlarda Erməni Apostol Kilsəsinin vergiyə cəlb edilməsi məsələsini müzakirə etmək lazımdır”. Hətta A.Simonyan keşiş Baqrat Qalstanyanın delimitasiya prosesinə etiraz edənlərə başçılıq etməsi ilə bağlı jurnalistlərə deyib ki, ruhani şəxsin siyasətlə məşğul olması qəbuledilməzdir. “Siyasət ticarətdir, İncildə isə deyilir: "Mənim atamın evini bazara çevirməyin!". Sizə elə gəlir ki, beynəlxalq tərəfdaşlarla danışıqlar aparmağımız ticarət deyil? Koalisiyaların yaradılması, siyahıların tərtib olunması - bütün bunlar ticarətdir. Kilsə isə öz işini buraxıb hazırda bununla məşğul olur", - deyə o bildirib.
Hökumət təmsilçilərinin vergi məsələsi ilə bağlı dedikləri kilsə təmsilçilərinin xoşuna gəlməyib. Eçmiədzin Ana taxt-tacının kansleriyasının rəhbəri, arxiyepiskop Arşak Xaçatryan “Sputnik Ermənistan”-a “kilsənin vergi ödəməməsi ilə bağlı iddialar, yumşaq desək, yalandır”- deyib.
Arxiyepiskop ad çəkmədən parlamentin spikerini boşboğazlıqda və yalan məlumat yaymaqda ittiham edib.
Şirak yeparxiyasının primatı, arxiyepiskop Mikael Acapaxyan isə spikerin niyyətini kiçik qisas adlandırıb.“Kimin intiqamını alırsınız? Necə bu qədər kiçik, bu qədər yazıq ola bilirsən?”- Acapaxyan deyib.
Arxiyepiskop xatırladıb ki, bolşeviklər də kilsəyə qarşı vuruşublar, lakin mahiyyət etibarı ilə məğlub olublar. “Kilsə sizinlə ideoloji mübarizə aparır, əgər siz bu sahədə qalib gələ bilsəniz, o zaman mübarizə aparın, yoxsa, vergi və gömrük terroru yalnız sizin bədbəxtliyinizi üzə çıxarır”.
Acapaxyan qisasçıların ölkəni idarə etməsini, dövlət aparatından şəxsi qisas aləti kimi istifadə etməsini faciə hesab edir. O, hakimiyyətdə olan bəzi şəxsləri “sərxoş oğullar” adlandırıb.
Qeyd edilir ki, erməni kilsəsinin vergiyə cəlb olunması məsələsi dəfələrlə qaldırılıb. Bu qınaqlara Eçmiədzinin Ana taxtı cavab verib ki, onlar vergi ödəyirlər, lakin kilsə təhsil, sosial və xeyriyyəçilik fəaliyyətinin xarakterinə görə müəyyən növ vergilərdən azaddır. Kilsə əmlak vergisi ödəmir, bununla belə, mənəvi mərkəzlərin qorunması və təkmilləşdirilməsi üçün dövlətdən vəsait almır.
Deyirlər ki, Erməni Apostol Kilsəsi Ermənistanda 1000 vergi ödəyicisi siyahısına daxil edilib. 2023-cü ilin sonunda o, siyahıda 758-ci yeri tutaraq 435 milyon dramdan çox ödəyib və 2024-cü ilin birinci rübünün nəticələrinə görə, 147 milyon dramdan çox vergi ödəməklə 488-ci yerdədir.
Göründüyü kimi, Ermənistanda yaranan bu mübahisəli məsələ qarşıdurmaya səbəb olub. Hökumət deyir ki, erməni kilsəsi vergi ödəmir, parlament sədri A.Simonyan “erməni kilsəsi vergiyə cəlb olunmalıdır” söyləyir. Kilsə də əsaslandırır ki, xeyriyyə işləri, sosial fəaliyyətə görə bəzi vergilərdən azadırlar, guya vergi ödəyirlər. Sözsüz ki, vergi tələbi qüvvəyə mindikdən sonra Eçmiədzin kilsəsinin böyük korrupsiya əməlləri, terroru maliyələşdirmə hərəkətləri üzə çıxacaq. Çünki vergidən yayınmanın arxasından artıq başqa şeylər gəlir.
“Şübhəsiz ki, kilsənin vergiyə cəlb edilməsi bütün qaranlıq fəaliyyətlərini ortaya çıxaracaq”
Milli Cəbhə Partiyasının sədr müavini, tanınmış ilahiyyatçı Tural İrfan “Bakı-Xəbər”ə şərhində “Məlumdur ki, erməni Qroqoryan kilsəsi mötədil xristianlıqdan fərqli bir cərəyandır. Siyasiləşmiş, əsasən də radikal fikirlərə sahib, revanşist bir mahiyyət daşıyan erməni kilsəsi həmişə xalqımıza qarşı qanlı savaşlara, soyqırımı aktlarına rəvac verib.
Ermənistanda kilsənin nüfuzu və təsiri hökumətdən üstündür. Bu məsələni balanslaşdırmaq üçün Baş nazir Paşinyan müəyyən cəhdlər etdi. Kilsə Ermənistanın işğal siyasətinə və revanşizminə həmişə rəvac verib, radikal mövqedə olub. Bu da Ermənistanın bölgədə provokator roluna şərait yaradıb. Qərbin də səlibçilik təfəkküründə olan dairələrinə alət olub. Ancaq indiki hakimiyyət həm öz hakimiyyətini möhkəmlətmək üçün, həm də kənar təsirləri minimuma endirmək üçün kilsənin təsirini azaltmaq istəyir. Erməni kilsəsi əslində dini fəaliyyətdən çox indiyəcən terror və təxribat planlarına xidmət edib. Özbaşına olaraq fəaliyyət göstərib, vergi verməyib, talançılığa yol verib, cəmiyyəti din adı ilə istismar edib. Əslində kilsənin vergiyə cəlb edilməsi onun şəffaf fəaliyyətindən çox dövlətə təsirini azaltmaqdır”-deyə bildirdi.
T.İrfanın sözlərinə görə, son mitinqlərdən sonra Ermənistan hökuməti dərk etdi ki, kilsə həm onun üçün, həm də dövlətin inkişafı üçün real təhlükəli vəziyyətdədir. O vurğuladı ki, eyni zamanda kilsə dünya siyasətindən, həmçinin bölgənin reallıqlarını anlamaq qabiliyyəti baxımından çox geridədir və orta əsr qaydaları ilə tələb irəli sürür. “Hazırda Ermənistan cəmiyyəti Paşinyan siyasətinə rəğbət bəsləyir. Qalstanyanın rüşvətxor müxalifətin töküntüləri olan keçmiş hakimiyyətdə olan fiqurlarla həmrəylik göstərməsi, Baş nazir postuna iddia etməsi onu ifşa etdi və xalq üçün yox, vəzifə üçün çalışdığını diqqətə qətirdi. Ona görə də mitinq dağıldı, keşiş geri çəkildi. Lakin cəmiyyətə də məlumdur ki, kilsə heç də onların rifahı üçün çalışmır. Ona görə kilsənin vergiyə cəlb edilməsi məsələsinə, ümumiyyətlə erməni kilsə sisteminin dövlətlə münasibətlərinə yenidən baxılacaq. Ermənistanda din-dövlət münasibətləri bəzən elə həddə çatır ki, hətta Ermənistanı teokratik dövlət də adlandırmaq olar. Demək olar ki, elə dövrlər olub, Ermənistanı kilsə idarə edib. Ermənistanın ilk “milli qəhrəman”ı da baş yepiskop, 1-ci Vazgendir. Bu heç də təsadüfi deyil. Qərbin Fransa kimi səlibçi, müstəmləkəçi dövlətləri həmişə erməni kilsəsindən terror maşası kimi istifadə edib. Qafqazda özləri edə bilmədiklərini kilsənin əli ilə ediblər. Məhz bu özü kilsənin revanşizmə, savaşa, qana, işğala, soyqırımına bilavasitə səbəbkar olduğunu sübut edir. Paşinyan görür ki, müasir dünya ilə uzlaşmada, region dövlətləri ilə münasibətlərin inkişafında, əsasən də türk düşmənliyi mövzusunda kilsə bütün xoşməramlı işlərə ciddi mane olur. Bu səbəbdən kilsəni neytrallaşdırmaq istəyir. Hesab edirəm ki, buna qismən nail olacaq”-deyə T.İrfan bildirdi.
T.İrfan kilsənin vergi məsələsindən çəkinməsinin səbəblərinə də aydınlıq gətirdi: “Şübhəsiz ki, kilsənin vergiyə cəlb edilməsi bütün qaranlıq fəaliyyətlərini ortaya çıxaracaq. İndiyəcən terroru da maliyyələşdirən mənbələrdən biri də məhz kilsədir. Korrupsioner məmur şəbəkəsi birbaşa kilsəyə “haqq” verir. Çünki kilsənin dövlətə təsiri sayəsində o məmurlar ayaqda qalırdı. Əsasən də əvvəlki hakimiyyətin liderləri bu işin içindədir. Kilsənin vergiyə cəlb olunması bütün bu kimi qara işləri ifşa edəcək” - deyə ilahiyyatçı qeyd etdi.
İradə SARIYEVA