Fransanın BMT-dəki statusdan sui-istifadəsi Qafqazda böyük fəsadlar törədir...
![Image](/uploads/posts/2023-11/1700658711_frans-mid_.webp)
Qulamhüseyn Əlibəyli: “Hərbi yardımlar göstərir ki, gələcəkdə növbəti qarşıdurmalar yaranmış olsun”
Prezident İlham Əliyev “Dekolonizasiya: Qadınların gücləndirilməsi və inkişaf” mövzusunda beynəlxalq konfransın iştirakçılarına müraciətində qeyd edib ki, Fransa təkcə keçmiş və indiki müstəmləkələrində deyil, eyni zamanda bizim regionumuzda – Cənubi Qafqazda stabilliyi pozur.
Ölkə başçısının fikrincə, Fransa BMT-dəki statusdan sui-istifadə edərək bunu edir: “Separatizm meyllərini və separatçıları dəstəkləyir. Ermənistanı silahlandırmaqla militarist siyasət həyata keçirir, revanşist qüvvələri təşviq edir, regionumuzda yeni müharibələrin başlaması üçün zəmin hazırlayır. Eyni zamanda Fransa BMT Təhlükəsizlik Şurasının daimi üzvü statusundan öz qərəzli, qeyri-obyektiv siyasətini yürütmək üçün sui-istifadə edir, müxtəlif regionlarda geosiyasi intriqalarla məşğul olur, Qərb təşkilatlarını digər dövlətlərə qarşı təzyiq vasitəsi kimi istifadə etməyə cəhdlər edir”.
“Ermənistan vasitəsilə Fransa Cənubi Qafqaza təsir göstərməyə, regionda söz sahibi olmağa çalışır”
Sözügedən məsələ ilə bağlı fikirlərini “Bakı-Xəbər”lə bölüşən sabiq millət vəkili, hüquqşünas Qulamhüseyn Əlibəyli hesab edir ki, Fransa ümumən avanturist mövqedən çıxış edir: “Hesab edirəm ki, cənab Prezidentin qeyd etdiyi məqamlar reallığı əks etdirir. Bu, Fransanın hazırkı şəraitdə, beynəlxalq miqyasda həyata keçirdiyi siyasətin çox sərrast, dəqiq şərhindən ibarətdir. Məsələ ondadır ki, Fransa artıq bir dövlət kimi nüfuzunu itirməkdədir. Afrikadan faktiki olaraq qovulub, köhnə müstəmləkələrdən sıxışdırılır. Bütün bunlara rəğmən, öz əvvəlki ikibaşlı siyasətindən əl çəkmək istəmir. Paris yeni mövqelər, nüfuz dairələri qazanmağa çalışır. Belə bir məqamda Cənubi Qafqaz Fransa üçün daha cazibədar görünür. Çünki orada “kiçik bacısı” olan Ermənistan mövcuddur. Ermənistan vasitəsilə Fransa Cənubi Qafqaza təsir göstərməyə, regionda söz sahibi olmağa çalışır. Ona görə də çalışır ki, Ermənistanı hərb baxımdan silahlandırsın. Bu ölkəni Azərbaycan və Türkiyəyə qarşı qoysun. Eyni zamanda, Rusiya və Ukrayna arasında gedən müharibəni nəzərə alaraq Ermənistanı Rusiyaya qarşı ikinci cəbhə kimi istifadə etmiş olsun. Bu, bütün Qərbin istəyidir, amma Fransa sözügedən məsələdə ermənilərlə yaxınlığından sui-istifadə edib xüsusi canfəşanlıq göstərir. Azərbaycana qarşı Ermənistanda revanşistləri dəstəkləyir. Hərbi yardımlar göstərir ki, gələcəkdə növbəti qarşıdurmalar yaranmış olsun. Ancaq Fransanın bu siyasəti, təbii ki, son nəticədə özünün əleyhinə çevriləcək. Yəni Paris bununla Azərbaycanın regional siyasətinə təsir göstərə bilməyəcək. Ancaq hər halda belə riyakar siyasətin nəticələri Fransa üçün yaxşı olmayacaq. O da bir reallıqdır ki, Fransa BMT Təhlükəsizlik Şurasının daimi üzv statusundan sui-istifadə edir. Bunun nəticəsidir ki, dəfələrlə Fransa Qarabağ məsələsini BMT mstəvisinə çıxarmağa çalışıb. Bu, Fransanın sözügedən statusdan necə sui-istifadə etməsinin əyani göstəricisidir”.
Vidadi ORDAHALLI