Ölkəmizə Füzulidən başlayan xarici səfərlər ənənəyə çevrilir...
Sahil Kərimli: “Azərbaycan dövlətinin apardığı siyasət nəticəsində tikdiyimiz hava limanları özünün siyasi, iqtisadi, hərbi məqsədlərini artıracaq”
Latviya parlamentinin sədri Daqya Mierinyan Azərbaycana səfərinə Fuzuli və Şuşadan başlayıb. Əslində bu, təqdir olunmalıdır. Çünki Azərbaycana təşrif buyuran qonaqlar adətən Bakı görüşlərini yekunlaşdırdıqdan sonra Qarabağa gedirlər. Latviyalı qonaq fərqli yol seçib.
Artıq Azərbaycana səfər edən rəsmilərin Füzuli hava limanına birbaşa uçması, dövlət səfərlərinə məhz oradan başlamaları tez-tez təkrarlanır. Bunun nə kimi siyasi və təbliğati üstünlükləri var?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, işğaldan azad olunmuş ərazilərdə sürətli və sıfırdan yenidənqurmanın, bərpa işlərinin, eyni zamanda bu istiqamətdə Azərbaycan dövlətinin həyata keçirdiyi nəhəng nəqliyyat kommunikasiya layihələrinin, yeni sosial obyektlər, yeni hava limanlarının, bir çox layihələrin həyata keçirilməsi dünyanın diqqət mərkəzindədir: “ Azərbaycan bu prosesi uğurla, öz gücünə həyata keçirməklə dünyaya həm də bir mesaj verir. Biz dövlətimizin siyasi iradəsinin, qətiyyətinin, iqtisadi imkanlarının hansı səviyyədə olduğunu dünyaya nümayiş etdirmiş oluruq. Bununla paralel olaraq beynəlxalq aləmin də Azərbaycana, işğaldan azad olmuş ərazilərə marağı durmadan artır. Biz son aylarda Qırğızıstan, Özbəkistan, Qazaxıstan, Belarus prezidentlərinin işğaldan azad olmuş ərazilərə səfərlərini, bu ərazilərdə erməni vandalizmin, Ermənistanın işğal dövründə həyata keçirdiyi kütləvi dağıntıların şahidi olmalarının şahidi oluruq. Bu bizi sevindirir. Eyni zamanda həyata keçirilən nəhəng infrastruktur layihələrini də nəzərə alaraq deyə bilərik ki, Azərbaycan dövləti öz qüdrətini bütün dünyaya nümayiş etdirir. Bu baxımdan bugünlərdə Latviya parlamentinin spikerinin birbaşa olaraq Fizuli hava limanına gəlməsi, buradan azad olunmuş ərazilərə, Şuşaya getməsi xüsusi önəm daşıyır. Bu səfərlər Azərbaycanın dünyada artan nüfuzunu daha da zirvələrə qaldırır. Mən hesab edirəm ki, belə səfərlər gələcəkdə də mütəmadi davam etdiriləcək. Həmin xarici ölkələrdən gələn qonaqlar birbaşa Füzuli hava limanından səfərlərini edəcəklər. Bu səfərlər nəticəsində də Azərbaycanda aparılan quruculuq işlərini öz gözləri ilə görəcəklər”.
Siyasi şərhçinin sözlərinə görə, bununla biz göstəririk ki, artıq Avropanın şəhərlərinə birbaşa uçuşlar həyata keçirilir: “Bu həm də onu göstərir ki, gələcəkdə Qarabağ və Şərqi Zəngəzur rayonlarının iqtisadi yüksəlişlərini artırmaq məqsədi üçün Avropa ölkələri ilə birbaşa əlaqələrin yaranmasına lojistik imkanlar mövcuddur. Biz gələcəkdə bu ərazilərin Avropa ilə əlaqələrini yaxşılaşdırmaq məqsədilə hava limanlarının verdiyi fürsətlərdən istifadə edə bilərik. Ölkə başçısının Avropa şəhərlərinə uçuşu bunun sübutudur. Mən inanıram ki, Azərbaycan dövlətinin apardığı siyasət nəticəsində tikdiyimiz hava limanları özünün siyasi, iqtisadi, hərbi məqsədlərini artıracaq. Şərqi Zəngəzurun və Qarabağın bərpa quruculuq işlərinə salınmış hava limanları öz töhfəsini verəcək”.
Məhəmmədəli QƏRİBLİ
