İran prezidenti mayın 19-da Ermənistana getməli idi? - Erməni mediası sensasiyalı xəbər yayıb...
Ramil Hüseynov: “Nə rəsmi, nə də digər İran media orqanlarında belə məlymat yayılmayıb”
İran Prezidenti İbrahim Rəisinin mayın 19-da Ermənistana nəzərdə tutulan səfəri təxirə salınıb. Bu barədə erməni mediası TASS agentliyinə istinadən məlumat yayıb.
Qeyd edilib ki, mayın 19-da Rəisinin Ermənistan ərazisində nəqliyyat dəhlizlərinin açılışında iştirak edəcəyi gözlənilirdi.
Erməni mediasının belə məlumat yayması diqqəti cəlb edir. Çünki Rəisi helekopterlə Təbrizə qayıtdıqdan sonra oradan Tehrana təyyarə ilə getməli idi.
O baxımdan maraqlıdır, Rəisinin 19 mayda Ermənistana səfər edəcəyi ilə bağlı məlumat var idimi? Doğrudanmı Rəisinin həmin gün Ermənistana səfər etməsi və Ermənistanda nəqliyyat dəhlizlərinin açılışında iştirak etmək planı olub? Olubsa, o zaman səfər həmin gün niyə ləğv edilib?
“Əgər Rəisi Ermənitana səfər edəcəkdisə, o zaman onun helekopteri niyə Təbrizə doğru istiqamət alıb?”
Sözügedən məsələyə aydınlıq gətirən “Yeni Xətt” Müstəqil Siyasi Tədqiqatlar Mərkəzinin sədri Ramil Hüseynov buna birmənalı yanaşmadı: “Əvvəla, həmin gün Rəisinin Ermənistana səfər edəcəyi ilə bağlı İran tərəfinin məlumatı olmayıb. Nə rəsmi, nə də digər İran media orqanlarında belə məlumat yayılmayıb. Cəbrayıldan Ermənistana məsafə çox yaxındır. Daha dəqiq desək, Mehri-İran sərhədinə bir neçə kilometrlik yoldur. Ermənistanla İran arasında nəqliyyat dəhlizi açılacaqdısa, məhz həmin yerdə olmalı idi. Çünki Ermənistan İranla vur-tut 43 kilometrlik sərhədə malikdir. Bu ölkələr arasında başqa quru sərhədi yoxdur. Əgər Rəisi Ermənitana səfər edəcəkdisə, o zaman onun helekopteri niyə Təbrizə doğru istiqamət alıb? İrəvanda dəhliz açılışı yoxdur ki, deyəsən ora təyyarə ilə gedirdi. O baxımdan TASS-a istinadən belə bir məlumat yayılsa da, o qədər də real görünmür. Belə bir səfər proqramı olsaydı, ən azından qabaqcadan hansısa məlumat yayılardı. İranın Ermənistandakı səfiri bununla bağlı hansısa açıqlama verərdi. Ona görə də bu məlumat o qədər də ciddi deyil. Başqa bir tərəfdən, eyni gündə ayrı-ayrı ölkələrlə açılış mərasimlərinin təşkili də bir qədər inandırıcı görünmür. Qəribəsi həm də odur ki, bu barədə İran və Ermənistanın rəsmi agentlikləru yox, Rusiyanın rəsmi TASS agentliyi məlumat yayır. Həqiqətən də belə bir səfər planının olub-olmaması barədə, güman edirəm ki, İran tərəfinin hansısa açıqlaması olacaq”.
Vidadi ORDAHALLI
