Ermənistandan etiraf - kəndləri işğal etmişdik, qaytardıq...
Elşad Həsənov: “Bununla etiraf edib ki, Ermənistan uzun illər Qazaxın kəndlərini işğal altında saxlayıb”
“Biz hesab edirik ki, demarkasiya prosesi uğurla keçib, Ermənistan ərazisindən bir millimetr də ərazi verilməyib”. Bu sözləri Ermənistan Təhlükəsizlik Şurasının katibi Armen Qriqoryan İctimai Radioya müsahibəsində deyib.
Qriqoryan Almatı Bəyannaməsi əsasında sərhədin delimitasiyası prosesinə toxunaraq qeyd edib ki, Ermənistanla Azərbaycan arasında mühüm razılaşma əldə olunub. O, daha sonra deyib: “Bu, 1976-cı il xəritələrinə uyğun olaraq demarkasiyanı davam etdirməyimiz üçün presedent yaratdı”.
“Ermənistan Azərbaycana nəyi güzəştə gedib” sualına isə Qriqoryan belə cavab verib: “Ermənistanın ərazisi qanunla sizə məxsus olan yerdir”.
Bununla Təhlükəsizlik Şurasının katibi birbaşa və açıq mətnlə söyləyir ki, Azərbaycana qaytarılan kəndlər Ermənistana məxsus deyil, işğal olunub, Azərbaycanındır və indi də geri verilir.
“Yaxşı bilirlər ki, keşiş Baqratın arxasında dayanan qüvvələr Robert Köçəryan və Serj Sarkisyandır”
Sözügedən məsələni “Bakı-Xəbər”ə şərh edən siyasi ekspert Elşad Həsənovun fikrincə, Qriqoryanın etirafı həm də revanşist qanada ünvanlanıb ki, sərhədlərin delimitasiyasına mane ola bilməyəcəksiniz: “Məlum olduğu kimi, artıq sərhəddə delimitasiya və demarkasiya başlayıb. Artıq Ermənistan da Tavuş istiqamətində sərhəddə sərhədçiləri yerləşdirib. Azərbaycanın məlum 4 kəndinin qaytarılmasına qərar verilib. Həmçinin sərhəd dirəkləri və məftillər də artıq qurulub. O baxımdan Qriqoryan doğru olaraq vurğulayıb ki, biz Azərbaycanın ərazilərini qaytarmışıq. Söhbət Qazaxın 1990-1992-ci illərdə işğal edilən kəndlərindən gedir. Onu da qeyd edim ki, 1984-cü ildə Qazaxın Kəmərli kəndindən Moskvanın göstərişi ilə 5 min hektardan çox torpaq sahəsi Ermənistana verildi. O zaman kənd sakinləri buna ciddi etiraz etdilər, amma bu nəzərə alınmadı. Ona görə də sərhədlər 1976-cı il xəritələri ilə müəyyən edilirsə, o zaman həmin ərazilər Azərbaycana qaytarılacaq. Çünki həmin ərazilər Azərbaycanın idi. Daha konkret desək, Kəmərli kəndinin otlaq sahələri idi. Təsadüfi deyil ki, mart-apreldə Nikol Paşinyan Qazaxla sərhəd erməni kəndlərində 2 dəfə yerli sakinlərlə görüşdü. Onlara anlatdı ki, bizim olanı saxlamaq üçün bizim olmayanı qaytarmaq lazımdır. Yəni o torpaqlar Ermənistana yox, Azərbaycana məxsusdur. Əslində Ermənistan Təhlükəsizlik Şurasının katibi Armen Qriqoryan da bunu deyib. Bununla etiraf edib ki, Ermənistan uzun illər Qazaxın kəndlərini işğal altında saxlayıb. Keşiş Baqratın Tavuşdan başlayaraq təşkil etdiyi aksiyaların da bir fayda vermədi. Çünki erməni cəmiyyəti müharibədən bezib və sülh istəyir. Yaxşı bilirlər ki, keşiş Baqratın arxasında dayanan qüvvələr Robert Köçəryan və Serj Sarkisyandır. Ona görə də Paşinyana qarşı mitinqlərdə kütləvilik alınmadı. Çünki əhali sülh istəyir”.
Vidadi ORDAHALLI
