Avroittifaqın Ermənistandakı missiyasının mandatı da dəyişdiriləcək...
Rəşad Bayramov: “Missiyanın adı dəyişsə də, onunla istənilən saziş, müqavilə imzalansa da, mahiyyəti və məramı dəyişməyəcək”
Ermənistan Respublikası ilə Avropa İttifaqı arasında Avropa İttifaqının Ermənistandakı missiyasının statusu haqqında saziş imzalanıb. Sazişi Ermənistan Xarici İşlər Nazirliyində xarici işlər nazirinin müavini Paruyr Hovhannisyan və Aİ-nin Ermənistandakı nümayəndə heyətinin rəhbəri, səfir Vasilis Maraqos imzalayıb.
Aİ səfiri ilk növbədə fevral ayından bu missiyanı qəbul etdiyinə görə Ermənistan hakimiyyətinə təşəkkür edib: “Bu missiya artıq Ermənistana sabitlik və təhlükəsizlik baxımınından çox şey təklif edib. Bu gün imzaladığımız status sazişi ölkədə missiyanın mövcudluğunun müxtəlif hüquq və vəzifələrinin tənzimlənməsinə gəldikdə daha çox hüquqi müəyyənlik gətirməyə kömək edəcək”.
Missiyanın genişləndirilməsinə gəlincə, bu məsələ bir neçə gün əvvəl Brüsseldə həllini tapıb. Avropa İttifaqının xarici işlər nazirləri Aİ-nin Ermənistandakı müşahidəçi missiyasının genişləndirilməsi təklifini bəyəniblər:
“Biz sabitliyi təşviq etmək, sərhədin Ermənistan tərəfinə nəzarət etmək və nələr edildiyini görmək üçün irəliləməyə və missiyanın ölkədə mövcudluğunu daha da gücləndirməyə hazırıq”.
Ermənistan bu sazişlə nəyə nail olmaq istəyir?
Politoloq Rəşad Bayramov “Bakı-Xəbər”ə açıqlamasında billdirdi ki, Azərbaycanla Ermənistan arasında sərhədlər müəyyənləşmədən regiona Aİ adından missiyanın göndərilməsi regionda təhlükəsizlik və əməkdaşlığın təmin olunmasına deyil, ziddiyyətlərin kəskinləşməsinə xidmət edir: “Çünki ermənipərəstlərin adı dəyişsə də nəticə dəyişmir. Monitorinq missiyası həm də Fransanın və digər kənar güclərin regiona ayaq açmaq və öz hərbi kontingentini bu ərazidə yerləşdirmək fürsəti kimi qiymətləndirilə bilər. Ona görə də Azərbaycan öz ərazisinə missiyanın gəlməsinə razılıq vermədi. Bu, həmin sənəddə və Prezident İlham Əliyevin çıxışında da vurğulanıb.
Yeni missiyanın göndərilməsi ilə bağlı Azərbaycanın mövqeyi və münasibəti nəzərə alınmadan Lüksemburqda regiona yeni missiya formalaşdırmaq və ona əlavə mandatlar vermək qərarı azı qanunsuzluq idi. Bu, əvvəl əldə olunmuş razılaşmaya da ziddir. Azərbaycan 30 ilə yaxın müddətdə Avropa İttifaqının aparıcı üzvü sayılan Fransanın da təmsil olunduğu ATƏT-in Minsk qrupunun mənasız və ikiüzlü ermənipərəst mövqeyindən bezmişdi. Bu missiyanın yaradılması etimad mühitini sarsıdır. Bu səbəbdən rəsmi Bakı həmin missiya ilə əməkdaşlığı nəzərdə tutmur.
Bu kimi “müşahidəçilər” isə Azərbaycanla Ermənistan arasında münasibətlərin normallaşmasına, sərhədlərin müəyyənləşməsinə yardım etməyəcək. Əksinə, Avropa İtifaqının vasitəçilik missiyasına, ona etimada zərbə vurur.
Nə qədər ki, rəsmi Paris İttifaq daxilində əsas söz sahiblərindən biri kimi görünür, qurumun nüfuzu düşəcək, ona etibar azalacaq.
Avropa İttifaqının açıqlamasında deyilib ki, missiyanın əlavə funksiyası Ermənistanda "təhlükəsizlik məsələlərinin öyrənilməsindən" ibarətdir. Bu isə rəsmi İrəvanın əldəyişməsi kimi də dəyərləndirilə bilər. Çünki bu ölkənin hərbi və təhlükəsizlik məsələləri Rusiya ilə bağlı olub. Bu açıqlama həm də onu göstərir ki, Ermənistan missiya adı ilə başqa çətirin altına keçməyə çalışır. Bütün bunlar onu deməyə əsas verir ki, missiyanın adı dəyişsə də, onunla istənilən saziş, müqavilə imzalansa da, mahiyyəti və məramı dəyişməyəcək”.
Məhəmmədəli QƏRİBLİ
