Məktəblər dərslik çatışmazlığından hələ də xilas ola bilmir - niyə?..
- Elçin Əfəndi: "Nəşrlərinin sayının çoxluğuna baxmayaraq, hələ də çatışmazlıqlar mövcuddur"
2 aydan çoxdur yeni tədris ili başlasa da, hələ də məktəblərdə dərslik problemi yaşanır. Orta ümumtəhsil müəssisələrində şagirdlər dərsliklərlə tam təmin olunmayıb.
Bununla bağlı həm valideynlər, həm də müəllimlər arasında xeyli narazılıq var. Tədris sentyabrın 15-dən başlasa da, xüsusən də yuxarı sinif dərsliklərinin böyük əksəriyyətinin olmadığı bildirilir. Təbii ki, mövcud vəziyyət həm şagirdləri, həm də müəllimləri çətin duruma salıb. Bəzi valideynlər övladlarının təhsildən geri qalmaması üçün dərslikləri sosial platformadan çıxarış etmək və yaxud da mağazalardan almaq məcburiyyətində qalıb. Bu problemin yaranmasının səbəbi isə məktəblərdə dərsliklərin saya uyğun paylanmaması ilə izah olunur.
Maraqlıdır, təhsil müəssisələrində dərslik qıtlığının səbəbi nədən qaynaqlanır? Bu problem necə həll olunmalıdır?
- "Dərsliklər dövlət tərəfindən pulsuz verilsə də, əksər valideynlər çatışmazlıq qarşısında çətin vəziyyətdə qalır"
Təhsil eksperti Elçin Əfəndi bildirdi ki, hər tədris ilində dərslik çatışmazlığı ilə bağlı problemlər yaşanır: "Dərslər başlayandan 1-2 həftə, hətta bəzən daha uzun müddət dərslik çatışmazlığı ilə bağlı respublikanın müxtəlif bölgələrindən informasiyalar əldə edirik. Əsasən bu dərsliklər yaxşı oxumayan şagirdlərə verilmir. Vəsaitlə təmin olunduqda belə köhnə, istifadəyə yararlı olmayan kitablar verilir. Bu yanaşma doğru deyil. Düşünürəm ki, aidiyyəti qurumlar bu sahədə müvafiq işlər görməlidir".
E.Əfəndinin sözlərinə görə, dərsliklər dövlət tərəfindən pulsuz verilsə də, əksər valideynlər çatışmazlıq qarşısında çətin vəziyyətdə qalır: "Kitab verilmədiyi halda valideyn məcbur olub öz hesabına dərslik almalı olur. Bu doğru deyil. Dövlət tərəfindən təhsilin əlçatanlığının hər bir vətəndaş üçün təmin olunması dövlət başçısı tərəfindən xüsusi olaraq vurğulanıb və bu istiqamətdə işlərin görülməsi tələb olunur. Təhsilin əlçatanlığı təmin olunursa, o halda dərs gedişatında istifadə olunan istər əsas, istər köməkçi fənlərlə şagirdlər tam təmin olunmalıdır. Aidiyyatı kitabların hazırlanması üzrə komissiyalar daha erkən çap və nəşr işlərini yerinə yetirməlidir. Nəşr prosesini avqust ayının sonlarında yekunlaşdırmalı və Regional Təhsil İdarələrinin tabeliyində olan məktəblərdən şagirdlərin sayı ilə bağlı məlumatları əldə edilməlidir. Tədrisin başlamasına 2 həftə qalmış artıq bilinməlidir ki, hansısa bölgədə, ucqar kənddə vəsait çatışmazlığı var və dərhal onların təmin olunması istiqamətində iş aparılmalıdır. Bu il Elm və Təhsil Nazirliyi tərəfindən kifayət qədər vəsait nəşr olunub. Nəşrlərinin sayının çoxluğuna baxmayaraq, hələ də çatışmazlıqlar mövcuddur".
Günel CƏLİLOVA
