Ermənistan-KTMT münasibətləri yaxın perspektivdə nə vəd edir?..
- Ramil Məmmədli: “Hiss olunur ki, Qərb Fransa vasitəsilə İrəvanı tələsdirir”
İrəvan Ermənistana yardımla bağlı sənədin Kollektiv Təhlükəsizlik Müqaviləsi Təşkilatı (KTMT) sammitinin gündəliyindən çıxarılmasını xahiş edib. Bu barədə Kollektiv Təhlükəsizlik Müqaviləsi Təşkilatının (KTMT) Baş katibi İmanqali Tasmaqambetov Belarus Prezidenti Aleksandr Lukaşenko ilə görüşü zamanı deyib.
Noyabrın 22-də Minskdə KTMT ölkələrinin müdafiə nazirləri, xarici işlər nazirləri şuraları və təhlükəsizlik şuraları katibləri komitələrinin iclasları, 1 gün sonra təşkilatın sammiti keçiriləcək. Tasmaqambetovun sözlərinə görə, KTMT-nin ötən ilin noyabr sessiyasında İrəvanda verdiyi 34 tapşırığından bir neçəsi yerinə yetirilməyib. Bunlar Ermənistana dəstək sənədinin hazırlanması və Avropanın ATƏT kimi beynəlxalq təşkilatları ilə əməkdaşlığa dair tapşırıqlardır. Ermənistanın baş naziri Nikol Paşinyan ötən həftə Belarus prezidentinə Sammitdə iştirak etməyəcəyini bildirib.
2022-ci ilin noyabrında İrəvanda keçirilən KTMT sammitində Paşinyan təşkilatın Kollektiv Təhlükəsizlik Şurasının Ermənistana yardım göstərilməsi üzrə birgə tədbirlər haqqında qərar layihəsini imzalamayıb.
Görünən odur ki, Ermınistan KTMT-dən sürətlə uzaqlaşır. Artıq təşkilatın tədbirlərinə qatılmır. O baxımdan Ermənistan-KTMT münasibətlərini nə gözləyir?
- “Bu gedişlə çox güman ki, Ermənistan gələn il KTMT-dən çıxacaq”
Məsələ ilə bağlı “Bakı-Xəbər”ə açıqlama verən hərbi ekspert Ramil Məmmədli hesab edir ki, Ermənistanın KTMT-də təmsilçiliyi sürətlə qırılma nöqtəsinə doğru gedir: “Bunu şərtləndirən çoxsaylı faktorlar var ki, dəfələrlə bunları qeyd etmişik. Məsələ ondadır ki, Paşinyan 2022-ci ildən sistemli şəkildə KTMT-ni iqnor edir. KTMT-nin qərarlarına imza atmır, tədbirlərinə nümayişkəranə şəkildə qatılmaqdan imtina edir. Azərbaycanı bəhanə edərək təşkilatı açıq şəkildə tənqid edir, Ermənistana yardım etməməkdə ittiham edir. Bəlli məsələdir ki, bütün bunlarda Paşinyanın məqsədi Ermənistanı KTMT-dən uzaqlaşdırmaqdır. Necə deyərlər, “ayının min oyunu bir armudun üstündədir”. KTMT üzvü olan Ermənistan NATO üzvü olan Fransa ilə hərbi sahədə yaxından əməkdaşlıq edir, bu ölkədən müxtəlif silahlar alır. Fransanın hərbi məsləhətçilərini ölkəyə dəvət edir. Ermənistan müdafiə nazirinin birinci müavini - Silahlı Qüvvələrinin Baş Qərargah rəisi general-leytenant Edvard Asryan ABŞ-ın Avropa Komandanlığının Ştutqart şəhərindəki qərargahında Komandanlığın rəhbərinin müavini general-leytenant Stiven Başamla görüşür. Görüş zamanı Ermənistan-ABŞ hərbi əməkdaşlığına dair məsələlər müzakirə olunub. Bütün bunlar nə deməkdir? Bu, Ermənistanın KTMT-yə tüpürməsi deməkdir. Ermənilər deyə bilər ki, burada nə qəbahət var, Azərbaycan NATO üzvü olan Türkiyə ilə hərbi sahədə yaxından əməkdaşlıq edir, birgə hərbi təlimlər keçirir və s. Məsələ ondadır ki, Ermənistandan fərqli olaraq, Azərbaycan hansısa hərbi blokun üzvü olmadığı üçün burada hansısa məhdudiyyətdən söhbət gedə bilməz. Ancaq Ermənistan KTMT üzvü olduğu üçün bunu təşkilatla razılaşdırmalıdır. Bu gedişlə, çox güman ki, Ermənistan gələn il KTMT-dən çıxacaq. Hiss olunur ki, Qərb Fransa vasitəsilə İrəvanı tələsdirir. Ermənistana vəd edilib ki, KTMT-dən tam uzaqlaşsa, Qərbdən gərəkən dəstəyi alacaq. Ermənistan Rusiyadan böyük ölçüdə asılı olduğu üçün daha kəskin addımlar atmaqdan çəkinir. Ancaq görünən odur ki, Ermənistanın KTMT-dən uzaqlaşması qaçılmazdır”.
Vidadi ORDAHALLI
