Əliyev Fransanın müstəmləkə cinayətlərini BMT-yə çıxardı...
Tural İsmayılov: “Azərbaycan bu gün Fransanın müstəmləkəçiliyinə müqavimət göstərən ölkələrdən biridir”
Prezident İlham Əliyevin oktyabrın 20-də Bakıda keçirilən “Neokolonializm: İnsan Hüquqlarının Pozulması və Ədalətsizlik” mövzusunda beynəlxalq konfransın iştirakçılarına müraciəti BMT-nin rəsmi sənədi kimi yayılıb.
Dövlət başçısı müraciətində Azərbaycanın XXI əsrdə kolonializmin davam etməsindən və kolonializmin yeni təzahürləri meyllərinin artmasından narahatlığını vurğulayıb, Afrika, Cənub-Şərqi Asiya, Sakit Okean, Latın Amerikasında onlarla ölkəni işğal edən, sərvətlərini talayan, xalqlarını uzun illər əsarətdə saxlayan Fransanın həmin ərazilərdə hərbi və bəşəriyyət əleyhinə çoxsaylı cinayətlər törətdiyini, etnik və dini mənsubiyyətinə görə yüz minlərlə dinc sakini soyqırımına məruz qoyduğunu diqqətə çatdırıb.
Fransa kolonializminin utancverici yeni metodlarının bu gün də davam etməsindən təəssüfünü bildirən Prezident İlham Əliyev, eyni zamanda, Fransanın dünyada ən çox mina istifadə etmiş ölkələrdən biri olduğuna, Azərbaycanın mina partlayışından ən çox əziyyət çəkən ölkələr sırasında ön yerlərdən birini tutduğuna diqqət çəkib.
Qeyd edək ki, Prezident İlham Əliyevin sözügedən müraciətinin BMT-nin rəsmi sənədi kimi yayılması dövlət başçısının, eyni zamanda, Azərbaycanın beynəlxalq proseslərdə oynadığı mühüm rolun, o cümlədən dünyada kolonializmə qarşı mübarizə sahəsində birgə səylərin səfərbər edilməsinə, bəşəriyyətin rifahı, dünyanın kolonializmdən xilas olması məqsədilə yeni ideya və təşəbbüslərin irəli sürülməsinə töhfələrinin beynəlxalq ictimaiyyət tərəfindən yüksək qiymətləndirilməsinin əyani təzahürüdür.
Məlum müraciətin BMT-nin rəsmi sənədi kimi yayılması dünyada Fransanın müstəmləkə cinayətlərinə diqqətin yönəlməsində nə kimi rol oynayacaq?
“Bu sənəd Fransaya qarşı səs çıxarmayan, çağdaş dövrdə bu ölkənin törətdiyi cinayətlərə göz yuman ölkələr üçün çağırış xarekteri daşımalıdır”
Siyasi şərhçi Tural İsmayılov “Bakı-Xəbər”ə açıqlamasında qeyd etdi ki, Azərbaycan bu gün Fransanın müstəmləkəçiliyinə qarşı müqavimət göstərən ölkələrdən biridir: “İstər Qoşulmama Hərəkatının sədri, istərsə də Bakı Təşəbbüs Qrupunun rəhbəri kimi bu prosesə çox ciddi şəkildə töhfə verir. Bu baxımdan Azərbaycan Prezidentinin Fransa ilə bağlı müraciətinin BMT sənədi kimi yayılması Azərbaycanın bu sahədə qlobal təşəbbüskarlığını növbəti dəfə sübut edir. Məlum müraciətin BMT-nin sənədi kimi yayılmasının müstəsna siyasi əhəmiyyəti var. Bu sənəd Fransaya qarşı səs çıxarmayan, çağdaş dövrdə bu ölkənin törətdiyi cinayətlərə göz yuman ölkələr üçün çağırış xarekteri daşımalıdır. Artıq hamı Fransanın iyrənc siyasətinə etiraz etməyi bacarmalıdır”.
Günel CƏLİLOVA
