İrəvandan Bakıya - İsraildən kibersilah alırsınız...
İbrahim Rüstəmli: "Erməni ekspertin "Peqasus" proqramı ilə bağlı ittihamlarının heç bir əsası yoxdur"
Hər zaman olduğu kimi, ermənilər yenə də Azərbaycana iftira atmaqala məşğuldular. Erməni media eksperti Samvel Martirosyan iddia edib ki, guya Azərbaycan İsrailin icazəsi ilə Ermənistana qarşı casus "Pegasus" proqramlarından istifadə edir:
"Araşdırdığımız işlərin əksəriyyəti göstərir ki, bu, əslində İsrailin özəl şirkəti tərəfindən yaradılan və bir sıra ölkələrdə dövlət qurumlarına satılan özəl şirkət olan "Pegasus" casus proqramının həyata keçirilməsidir. Bildirilir ki, telefon dinləmələri cinayətkarların müəyyən edilməsi üçün xoş niyyətlə həyata keçirilir, lakin reallıq onu göstərir ki, müxtəlif diktatura rejimləri proqramdan siyasi məqsədlər üçün istifadə edirlər".
S.Martirosyanın sözlərinə görə, "Pegasus" casus proqram təminatının ən məşhur istifadəçilərindən biri Azərbaycandır və o, təkcə ölkə daxilində bu proqramdan cinayətkarlara qarşı deyil, siyasətçilərə qarşı da istifadə edir. Böyük beynəlxalq araşdırma qrupuna görə, guya Azərbaycan İsrail hökumətinin icazəsi ilə faktiki olaraq Ermənistana qarşı kibersilahdan istifadə edir: "Bu, hərbi ixrac sayılır və icazəsiz ölkələrə satılmır".
"Bu cür yalan məlumatlar yaymaqla imicimizə kölgə salmağa, beynəlxalq ictimai rəyi çaşdırmağa çalışırlar"
Məsələ ilə bağlı "Bakı-Xəbər"ə açıqlama verən hərbi ekspert İbrahim Rüstəmli hesab edir ki, deyilənlər ermənilərin növbəti sayıqlamasıdır: "Azərbaycan Vətən müharibəsində qalib gəldiyi üçün ermənilər İsraildən yanıqlıdılar. Onlar İsrailin Azərbaycana müasir zərbə dronları, modern silahlar satmasını hələ də həzm edə bilmirlər. Ona görə də Azərbaycanı qaralamaqla yanaşı, ara-sıra İsrailə də böhtan atırlar. Ona görə də erməni ekspertin "Peqasus" proqramı ilə bağlı ittihamlarının heç bir əsası yoxdur. Dövlətimiz nə ölkə daxilində, nə də Ermənistana qarşı bu proqramlardan istifadə etmir. Biz döyüş meydanında qalib gələn tərəfik. O cümlədən, hərbi qələbəmizi siyasi arenada tamamlamışıq. Bütün dünya Xankəndi zəfərimizi gördü. Azərbaycan xalqı bir yumruq olaraq Ali Baş Komandanın ətrafında sıx birləşib. Bunu həm müharibə dövründə, həm də ondan sonra gördük. Belə olan halda kimin nəyinə lazımdır hansısa siyasətçinin telefonunu dinləmək? Ermənistana gəldikdə, bu ölkə işğalçı siyasəti üzündən yaman gündədir. Əvvəl Rusiyanın forpostu idisə, indi Qərbin qoltuğuna sığınmağa çalışır. Ona görə də, deyilənlər sadəcə iftiradır. Bu cür yalan məlumatlar yaymaqla imicimizə kölgə salmağa, beynəlxalq ictimai rəyi çaşdırmağa çalışırlar. Belə kampaniyaların heç bir perspektivi yoxdur".
Vidadi ORDAHALLI
