Erməni separatçılarının taleyini Əminə Ərdoğan yox, Azərbaycan dövləti müəyyən edir - daha bir erməni yalanı açıldı...
Bəhruz Quliyev: “Bu məsələdə də ermənilər aranı qatmaq, münasibətlərə xələl gətirmək niyyəti güdürlər”
Müasir erməni ideoloqları Türkiyə-Azərbaycan münasibətlərindən ciddi əndişə keçirir və bunu ermənilər, Ermənistan üçün təhlükə sayırlar. Bu səbəbdən də hər addımbaşı mətbuata həqiqətə uyğun olmayan iddialar atıb qardaş ölkələrin əbədi münasibətlərini zədələməyə çalışırlar. Belələrindən biri də adını “türkoloq” qoyan Varujan Qeqamyandır ki, gecə-gündüz təxribatla məşğul olur.
Varujan Qeqamyan öz Telegram kanalında növbəti bir yalana “imza atıb”. İddia edir ki, 2021-ci ilin may ayında Ərdoğan həyat yoldaşı ilə Şuşaya ilk dəfə gələndə avtobusda Əliyevlərlə söhbət ediblər.
Guya ki, orada Rəcəb Tayyib Ərdoğanın həyat yoldaşı Əminə Ərdoğan erməni “hərbi əsirləri” Ermənistana təhvil verməməyi, Ermənistandan müxtəlif güzəştlər axtararaq onları tədricən (özünün təbirincə desək, “yavaş”) dəyişdirməyi təklif edib.
Varujan Qeqamyan Nyu-Yorkda Paşinyanın arvadı Anna Akopyanla Əminə Ərdoğanın söhbət etməsi və şəkil çəkdirməsindən də danışıb. “Ermənistanın faktiki baş nazirinin həyat yoldaşının Ərdoğanın həyat yoldaşı ilə xoşbəxt və həvəsli fotosu da dərc olunub. Bunun təkcə hüquqi deyil, həm də mənəvi əsası var”-deyə yazıb.
Təbii ki, erməni tərəfin dedikləri yalandır. Onlar belə görüntü yaradır ki, guya Azərbaycanın siyasətini nəinki Ərdoğan, hətta onun arvadı Əminə Ərdoğan də idarə edir. Məgər Azərbaycan özü ermənilərin "hərbi əsir" dedikləri cinayətkarlarla davranış üsulunu bilmir?
Erməni tərəfin bu yalan iddiası ilə bağlı nə deyə bilərsiniz?
“Bu o demək deyil ki, separatçıların taleyi kimi mühüm məsələlər Azərbaycan dövlətinin iradəsindən kənarda həll olunur”
“Bu gün məğlub Ermənistan Azərbaycana qarşı təxribatları sırasına birini də əlavə edib. Son zamanlar qardaş Türkiyənin dövlət rəsmilərinin, tanınmış şəxslərinin fikirlərini təhrif etməklə münasibətlərə xələl gətirmək, suyu bulandırmaq istəyirlər. Məqsəd Türkiyə ilə Azərbaycan arasında soyuqluq yaratmaq, etimadsızlıq mühiti formalaşdırmaqdır. Əlbəttə, düşmən öz işindədir, amma nədənsə türk xalqlarının nə qədər müdrik, uzaqgörən olduğunu ermənilər unudurlar. Türkiyə ilə Azərbaycanın acısı da, şirini də birdir və bundan sonra da bir olacaqdır”.
Bunu erməni iddiasını şərh edərkən “Bakı-Xəbər”ə SƏS Media Qrupun rəhbəri, siyasi analitik Bəhruz Quliyev deyib.
B.Quliyev qeyd edib ki, bütün dünya ölkələrində olduğu kimi, Azərbaycanda da dövlət siyasətini bəlli strukturlar, qurumlar formalaşdırır və həyata keçirir: “Ermənistanın aparıcı saytları Nyu Yorkda Anna Akopyanın Türkiyənin birinci xanımı Əminə Ərdoğanla görüşünü şərh edərək Paşinyanın xanımını “topa tutublar”. O cümlədən Əminə Ərdoğanın Şuşada olarkən erməni separatçıları barədə dediyi fikirləri əsas götürüb Türkiyə-Ermənistan münasibətlərində korrektələrin aparılmasının vacibliyini vurğulayıblar. Əlbəttə, Türkiyənin birinci xanımının separatçı liderlərin Ermənistana verilməməsində mövqeyi haqlı idi. Amma bu o demək deyil ki, separatçıların taleyi kimi mühüm məsələlər Azərbaycan dövlətinin iradəsindən kənarda həll olunur. Qeyd edək ki, bu məsələdə də ermənilər aranı qatmaq, münasibətlərə xələl gətirmək niyyəti güdürlər. Türkiyə ilə Azərbaycan qardaş ölkədir, strateji müttəfiqliyimiz Şuşa Bəyannaməsi ilə əbədiləşib, bundan başqa bizim “bir millət” bağlarımız var. Bizi bir-birimizdən ayıracaq güc yoxdur və bundan sonra da olmayacaq”.
İradə SARIYEVA
